ឯកឧត្តម ហែម វណ្ណឌី លើកទឹកចិត្ត SentoSaSilk ឱ្យធ្វើជាអាជីវកម្មគំរូក្នុងអាជីវកម្មសូត្រនៅកម្ពុជា
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបតំណាងក្រុមហ៊ុន SentoSaSilk នៅថ្ងៃទី៣១ ខែមករា ឆ្នាំ២០២៤ និងបានលើកទឹកចិត្តក្រុមហ៊ុនឱ្យធ្វើជាអាជីវកម្មគំរូក្នុងអាជីវកម្មសូត្រនៅក្នុងប្រទេស។
ឯកឧត្តមបានលើកឡើងថា សូត្រគឺជាផលិតផលមរតកដូនតា និងមានគុណតម្លៃផ្នែកវប្បធម៌សម្រាប់កម្ពុជា។ ឯកឧត្តមបានបញ្ជាក់ថា ក្រសួងកំពុងផ្តោតការយកចិត្តទុកដាក់លើវិស័យសិប្បកម្ម ដែលអាចរួមចំណែកដល់ការអភិរក្សសម្បត្តិវប្បធម៌ និងពង្រឹងសេដ្ឋកិច្ចច្នៃប្រឌិត ដែលរួមមានវិស័យសូត្រ។
នៅក្នុងជំនួបនោះ លោកស្រីសេង តក្កនារី នាយកគ្រប់គ្រងក្រុមហ៊ុន SentoSaSilk បានបង្ហាញពីការប្តេជ្ញាចិត្តរបស់ក្រុមហ៊ុនក្នុងការនាំយកបេតិកភណ្ឌវប្បធម៌ដ៏សម្បូរបែបរបស់កម្ពុជាទៅកាន់ពិភពលោក។ លោកស្រីបានលើកឡើងថា ក្រុមហ៊ុនបានដំណើរការជិតពីរទសវត្សរ៍មកហើយ និងត្រូវបានទទួលស្គាល់ជាអន្តរជាតិ ហើយក៏បានឈានជើងចូលក្នុងទីផ្សារអន្តរជាតិផងដែរ។
សហការជាមួយ Sota Cambodia Silk ក្រុមហ៊ុន SentoSaSilk បាននាំយកផលិតផលសូត្រខ្មែរដល់អ្នកប្រើប្រាស់ក្នុងទីផ្សារជប៉ុន និងទីផ្សារអន្តរជាតិ ដោយបានបញ្ចូលវប្បធម៌ និងសិល្បៈហត្ថកម្មដ៏ប៉ិនប្រសប់ទៅក្នុងស្នាដៃនៃផលិតផលនីមួយៗ។
ទោះបីមានការប្រកួតប្រជែងខ្លាំងនៅលើទីផ្សារ ការបញ្ចូលវប្បធម៌ និងឧត្តមភាពសិល្បៈគឺជាចំណុចពិសេសសម្រាប់ភាពជោគជ័យរបស់ SentoSaSilk ។
លោកស្រីបានទទួលស្គាល់ពីតួនាទីដែលមិនអាចខ្វះបាននៃការចុះបញ្ជីផលិតផល និងបានអរគុណចំពោះការគាំទ្ររបស់ក្រសួងឧស្សាហកម្ម វបន ក្នុងការចុះបញ្ជីផលិតផល ដោយលើកឡើងថា៖ "ផលិតដែលយើងខំផលិតបាន បើមិនចុះបញ្ជី ប្រៀបបាននឹងកូនរបស់យើងដែលគ្មានបញ្ជីកំណើតអញ្ចឹងដែរ។" លោកស្រីបានបន្តថា៖ “ការការពារដែលទទួលបានពីការចុះបញ្ជីផលិតផលមិនត្រឹមតែជួយសម្រួលដល់ការធ្វើពាណិជ្ជកម្មអន្តរជាតិប៉ុណ្ណោះទេ ប៉ុន្តែថែមទាំងបង្កើនទំនុកចិត្តអតិថិជន និងភាពជឿជាក់លើផលិតផលនៅលើឆាកអន្តរជាតិផងដែរ។"
ឯកឧត្តមរដ្ឋមន្ត្រី បានបញ្ជាក់បន្ថែមថាក្រសួងកំពុងគាំទ្រដល់ប្រព័ន្ធអេកូឡូស៊ីវិស័យសូត្រកម្ពុជា និងសូមលើកទឹកចិត្ត SentoSaSilk ឱ្យសហការជាមួយមជ្ឍមណ្ឌលសូត្រខ្មែរ ដើម្បីពង្រីកមុខផលិតផលថ្មីៗ ចាប់យកបច្ចេកវិទ្យា និងអភិក្រមប្រកបដោយនវានុវត្តន៍ ដើម្បីបង្កើនភាពប្រកួតប្រជែង និងតម្លៃបន្ថែមខ្ពស់។ ឯកឧត្តមក៏បានលើកទឹកចិត្តឱ្យ SentoSaSilk សហការជាមួយក្រសួងដើម្បីបង្កើតស្តង់ដារសម្រាប់ផលិតផលសូត្រកម្ពុជា ដើម្បីបើកឱកាសថ្មីសម្រាប់បង្កើនការនាំចេញ និងការទទួលស្គាល់ជាសកល។