ឯកឧត្តម ហែម វណ្ណឌី លើកទឹកចិត្តជ័យលាភីអាហារូបករណ៍នូវែលសេឡង់ឱ្យប្រកាន់យកមនសិការបន្តវេន
ឯកឧត្តម ហែម វណ្ណឌី បានទទួលជួបសំណេះសំណាលជាមួយជ័យលាភីអាហារូបករណ៍នូវែលសេឡង់ នៅថ្ងៃទី១១ ខែមករា ឆ្នាំ២០២៤ ហើយបានលើកទឹកចិត្តពួកគេឱ្យប្រកាន់យកមនសិការបន្តវេន ដោយត្រូវមានចំណេះជំនាញ និងត្រៀមខ្លួនដើម្បីបម្រើសង្គមជាតិ។
ខណៈដែលជ័យលាភីទាំងនេះគ្រោងនឹងចេញដំណើរទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៅប្រទេសនូវែលសេឡង់ ឯកឧត្តមបានអបអរសាទរ និងសម្តែងក្តីរីករាយដែលឃើញមានចំនួនជ័យលាភីជាស្ត្រីច្រើន។ នេះស្របតាមគោលដៅរបស់រាជរដ្ឋាភិបាលក្នុងការជំរុញការចូលរួមរបស់ស្ត្រីឱ្យបានកាន់តែប្រសើរនៅក្នុងការអភិវឌ្ឍសង្គម-សេដ្ឋកិច្ចរបស់កម្ពុជា។
ក្រៅពីការខិតខំសិក្សារៀនសូត្រ ឯកឧត្តមបានណែនាំពួកគេឱ្យពង្រឹងភាពជាអ្នកដឹកនាំ ដោយបញ្ជាក់ថា សមត្ថភាពក្នុងការដឹកនាំអ្នកដទៃគឺជាមូលដ្ឋានគ្រឹះសម្រាប់ការអភិវឌ្ឍអាជីពនាពេលអនាគត។ ឯកឧត្តមក៏បានលើកទឹកចិត្តជ័យលាភីទាំងអស់ឱ្យបណ្តុះវប្បធម៌ចែករំលែក ការណែនាំបន្ត និងធ្វើជាគំរូល្អដល់អ្នកដទៃ។
ក្រោយជម្រាបជូនអំពីអាណត្តិកិច្ចរបស់ក្រសួង ឯកឧត្តមរដ្ឋមន្ត្រីបានជំរុញឱ្យជ័យលាភីទាំងអស់បង្កើនចំណេះដឹង និងជំនាញផ្នែកបច្ចេកវិទ្យា ដោយរួមគ្នាពូនជ្រំបច្ចេកវិទ្យាឱ្យក្លាយជាគ្រឹះដ៏រឹងមាំសម្រាប់ការអភិវឌ្ឍគ្រប់វិស័យ។
ដោយរំពឹងថានឹងមានការផ្លាស់ប្តូររចនាសម្ព័ន្ធនៃសេដ្ឋកិច្ចកម្ពុជានាពេលខាងមុខ ឯកឧត្តមបានលើកឡើងថា បច្ចេកវិទ្យាដូចជាបញ្ញាសិប្បនិម្មិត ស្វ័យប្រវត្តិកម្ម បច្ចេកវិទ្យារូបូត និងដ្រូនជាដើម នឹងមានតួនាទីកាន់តែសំខាន់។
ឯកឧត្តមបានណែនាំឱ្យជ័យលាភីទាំងអស់ត្រៀមខ្លួនក្នុងវិស័យបច្ចេកវិទ្យា ដើម្បីរួមចំណែកយ៉ាងសកម្មដល់ការកសាងអនាគតបច្ចេកវិទ្យារបស់កម្ពុជា និងសេដ្ឋកិច្ចដែលផ្អែកលើចំណេះដឹង។