រាជធានីភ្នំពេញ ថ្ងៃទី៣១ ខែមករា ឆ្នាំ២០២៦ — ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានរៀបចំសិក្ខាសាលា ដើម្បីពង្រឹងការផ្សារភ្ជាប់រវាងស្ថាប័នស្រាវជ្រាវ និងវិស័យឧស្សាហកម្ម ក្នុងគោលដៅ​ពន្លឿនបរិវត្តកម្មរបស់កម្ពុជាឆ្ពោះទៅសេដ្ឋកិច្ចផ្អែកលើចំណេះដឹង និងនវានុវត្តន៍។

សិក្ខាសាលា ក្រោមប្រធានបទ «ពីការស្រាវជ្រាវដោយគុណភាព ទៅកាន់ការផ្ទេរបច្ចេក​វិទ្យានៅ​កម្ពុជា» មានអ្នកចូលរួមប្រមាណ ១០០ នាក់ តំណាងស្ថាប័នរាជរដ្ឋាភិបាល គ្រឹះស្ថានសិក្សាស្រាវជ្រាវ និងវិស័យ​ឯកជន ដោយបានពិភាក្សាដំណោះស្រាយនៃការប្រែក្លាយលទ្ធផលស្រាវជ្រាវ ទៅជាបច្ចេកវិទ្យាជាក់ស្តែង ឬឧបករណ៍គោលនយោបាយ។

ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង​នវា​នុវត្តន៍ បានសង្កត់ធ្ងន់ថា ទោះបីជាសកម្មភាពស្រាវជ្រាវមានការកើនឡើងក៏ដោយ ប៉ុន្តែផលសម្រាប់​សង្គម គឺអាស្រ័យលើគុណភាពនៃលទ្ធផលស្រាវជ្រាវ ប្រសិទ្ធភាពនៃពាណិជ្ជូបនីយកម្ម និងការបញ្ចូលលទ្ធផលទាំងនោះទៅក្នុងគោលនយោបាយ។

ឯកឧត្តមបានលើកឡើងថា៖ “ការស្រាវជ្រាវដែលតម្រង់ទិសតាមបេសកកម្ម ផ្តោតលើការផ្តល់​អភិ​ក្រម​ជា​ប្រព័ន្ធ ដើម្បីសម្រេចបាននូវគោលដៅជាក់លាក់ណាមួយ ដោយប្រើប្រាស់វិធីសាស្ត្រផ្អែកលើដំណោះ​ស្រាយ និងលទ្ធផល។”

ឯកឧត្តមបានរំលេចពីភាពចាំបាច់នៃការតម្រង់ទិសវិនិយោគវិទ្យាសាស្ត្រ ឱ្យស្របទៅនឹងបេសកកម្ម​អាទិ​ភាព​​​ទាំង៨ នៃរបៀបវារៈស្រាវជ្រាវជាតិ ឆ្នាំ២០២៥ រាប់ចាប់ពីសន្តិសុខស្បៀងក្នុងស្រុក និង​អព្យាក្រឹត​ភាពកា​បូន រហូតដល់សេវាសុខភាពដំណើរការដោយបច្ចេកវិទ្យាឌីជីថល។

សិក្ខាសាលាក៏បានលើកយកករណីសិក្សាស្តីពីការពង្រឹងប្រព័ន្ធសុខាភិបាលតាមរយៈលទ្ធផលស្រាវជ្រាវ និងការផ្ទេរបច្ចេកវិទ្យា សម្រាប់ការធ្វើគោលនយោបាយលើកកម្ពស់សុខភាពសាធារណៈ និងករណីសិក្សាមួយទៀត ដែលផ្តោតលើការផ្ទេរបច្ចេវិទ្យាសម្រាប់សហគ្រាសធុនតូចនិងមធ្យម ក្នុងវិស័យ​ចំណីអាហារ​ក្នុង​ស្រុក។

សាស្ត្រាចារ្យ បណ្ឌិត យី ស៊ីយ៉ាន មកពីសាកលវិទ្យាល័យជាតិសិង្ហបុរី (NUS) បានបង្ហាញពីកម្ម​វិ​ធី NUS Cambodia Program ដែលមានគោលបំណងប្រែក្លាយការស្រាវជ្រាវសុខភាពសាធារណៈ ទៅជាសកម្ម​ភាពផ្អែកលើភស្តុតាង។

ឯកឧត្តម ហ៊ុល សៀងហេង បានបញ្ជាក់ថា បណ្តាប្រទេសអភិវឌ្ឍន៍បានបញ្ជ្រាបការស្រាវជ្រាវ និងអភិវឌ្ឍន៍ (R&D) ទៅក្នុងរបៀបវារៈអភិវឌ្ឍន៍របស់ខ្លួនប្រកបដោយយុទ្ធសាស្ត្រ។ ឯកឧត្តមបានផ្តល់អនុសាសន៍ឱ្យ​មានការផ្លាស់ប្តូរ ឆ្ពោះទៅរកមូលធនមនុស្សកម្រិតពិភពលោក និងសមត្ថភាព R&D ដ៏រឹងមាំ ដើម្បីសម្រេច​បាននូវចក្ខុវិស័យកម្ពុជា ឆ្នាំ២០៥០។

ឯកឧត្តមបានលើកឡើងថា៖ “គ្មានប្រទេសណាមួយដែលទទួលបានកំណើនសេដ្ឋកិច្ច-សង្គម ដោយ​គ្មាន​ការ​ពង្រឹងភាពប្រកួតប្រជែងវិទ្យាសាស្ត្រ និងបច្ចេកវិទ្យាជាតិ ជាពិសេសតាម​រយៈការវិនិយោគលើ​ការស្រាវជ្រាវ និងអភិវឌ្ឍន៍នោះទេ។”

ឯកឧត្តមក៏បានអំពាវនាវដល់តួអង្គពាក់ព័ន្ធឱ្យរួមចំណែកពង្រឹងប្រព័ន្ធអេកូឡូស៊ីមួយ ដែលគួរឱ្យទុកចិត្ត ប្រកបដោយភាពដឹកនាំ និងការរៀបចំផែនការដែលមានចក្ខុវិស័យវែងឆ្ងាយ ដើម្បីប្រែក្លាយការស្រាវជ្រាវ របស់កម្ពុជា ទៅជាដំណោះស្រាយពិតប្រាកដ។