ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញជាអធិបតីក្នុងពិធីប្រកាសផ្ទេរនិងតែងតាំងអគ្គនាយករដ្ឋាករទឹកស្វយ័តក្រុងភ្នំពេញ

------------------------------

នៅព្រឹកថ្ងៃទី ៣០ខែសីហា ឆ្នាំ២០២១ នៅសាលប្រជុំអង្គភាពរដ្ឋាករទឹកក្រុងភ្នំពេញ មានរៀបចំពិធីប្រកាសផ្ទេរនិងតែងតាំងអគ្គនាយករដ្ឋាករទឹកស្វយ័តក្រុងភ្នំពេញ ក្រោមអធិបតីភាពឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយមានការចូលរួមជាគណៈអធិបតី ពីឯកឧត្តម អ៊ុំ សុថា ប្រធានក្រុមប្រឹក្សាភិបាលជារដ្ឋលេខាធិការតំណាងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ឯកឧត្តម មុី វ៉ាន់ រដ្ឋលេខាធិការតំណាងមកពីក្រសួងសេដ្ឋកិច្ចនិងហិរញ្ញវត្ថុ ឯកឧត្តម នួន ផារ័ត្ន អភិបាលរងតំណាងរដ្ឋបាលរាជធានីភ្នំពេញ និងឯកឧត្តម សៀង ធីរិទ្ធ តំណាងនិយ័តករមូលបត្រកម្ពុជា និងដោយមានការចូលរួមពីថ្នាក់ដឹកនាំនិងមន្ត្រីក្រោមឱវាទក្រសួងនិងអង្គភាពរដ្ឋាករទឹកនិងតំណាងភាគីពាក់ព័ន្ធប្រមាណ៧៣០នាក់ ។ ក្នុងនោះចូលរួមតាមប្រព័ន្ធអនឡាញចំនួនប្រមាណ៧០០ នាក់ ។

បន្ទាប់ពីការអានអនុក្រឹត្យតែងតាំង និងមានការប្រគល់អនុក្រឹត្យនិងត្រារដ្ឋាករទឹកស្វយ័តក្រុងភ្នំពេញរួចមក ឯកឧត្តមបណ្ឌិត សុីម សុីថា អតីតជាអគ្គនាយករដ្ឋាករទឹកស្វយ័តក្រុងភ្នំពេញ ដែលត្រូវចូលនិវត្តន៍ និងត្រូវបានតែងតាំងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអញ្ជេីញឡេីងមានប្រសាសន៍លេីកឡេីងពីប្រវត្តិការងារ និងរបាយការណ៍សង្ខេបស្តីពីសមិទ្ធផល ក៏ដូចជាស្នាដៃសម្រេចបានក្នុងអណត្តិការងាររបស់ឯកឧត្តម ក្នុងរយៈពេល៩ឆ្នាំកន្លងមក ក្នុងលទ្ធផលគួរជាទីមោទនៈ ។

តមកឯកឧត្តម ឡុង ណារ៉ូ អតីតជាអគ្គនាយករងរដ្ឋាទឹកស្វយ័តក្រុងភ្នំពេញ និងត្រូវបានតែងតាំងជាអគ្គនាយករដ្ឋាករទឹកស្វយ័តក្រុងភ្នំពេញថ្មី បានអញ្ជេីញឡេីងមានប្រសាសន៍លេីកឡេីងពីប្រវត្តិការងារ ប្រវត្តិការបន្តការសិក្សារៀនសូត្រ ការក្រេបជញ្ជក់បទពិសោធន៍ការងារពីថ្នាក់ដឹកនាំជារៀមច្បង ក៏ដូចជាពីជំនាញការបរទេស ដែលឯកឧត្តមធ្លាប់បំពេញការងារក្នុងអង្គភាពរដ្ឋាករទឹកក្រុងភ្នំពេញមានរយៈពេលយ៉ាងយូរឆ្នាំ បន្ទាប់ពីឯកឧត្តមបានបញ្ចប់ការសិក្សាមកពីសាធារណរដ្ឋសហព័ន្ធអាល្លឺម៉ង់នៅឆ្នាំ១៩៨៩ ។ ជាមួយគ្នានេះ ឯកឧត្តម ឡុង ណារ៉ូ ក៏បានធ្វេីការប្តេជ្ញាចិត្តខិតខំសម្រេចឲ្យបាននូវសមិទ្ធផលថ្មីៗបន្ថែមទៀតបន្តពីសមិទ្ធផលទាំងឡាយដែលសម្រេចបានដោយថ្នាក់ដឹកនាំជារៀមច្បងមុនៗ ជាពិសេសដេីម្បីឆ្លេីយតបនិងគុណបំណាច់ដ៏ថ្លៃថ្លាប្រកបដោយមហាកិត្តិយសដែលរូបឯកឧត្ដម ត្រូវបានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ផ្តល់នូវតួនាទីដឹកនាំអង្គភាពដែលជាគុណបំណាច់មួយជីវិតក្នុងជីវភាពជាមន្ត្រីសាធារណៈ ដែលមានកាតព្វកិច្ចបម្រេីជាតិមាតុភូមិ និងប្រជាជន ដោយការទទួលខុសត្រូវខ្ពស់ ។

មានប្រសាសន៍សំណេះសំណាលក្នុងអង្គពិធី ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់និងកោតសរសេីរចំពោះសមិទ្ធផលការងារធំៗទាំងឡាយដែលឯកឧត្តមបណ្ឌិត សុីម សុីថា សម្រេចបាននាពេលកន្លងមកបន្ទាប់ពីឯកឧត្តមបានត្រូវបានតែងតាំងជាអគ្គនាយករដ្ឋាទឹកស្វយ័តក្រុងភ្នំពេញកាលពីថ្ងៃទី ៨ខែមិថុនា ឆ្នាំ២០១២ ដោយបន្តអណត្តិពីឯកឧត្តម ឯក ស៊ុនចាន់ បច្ចុប្បន្នជារដ្ឋមន្ត្រីប្រតិភូអមនាយករដ្ឋមន្ត្រី និងជាអតីតអគ្គនាយករដ្ឋាករទឹកស្វយ័តក្រុងភ្នំពេញពីឆ្នាំ១៩៩៣ ដល់ឆ្នាំ២០១២ ។ តាំងពីនោះនិងជាបន្តបន្ទាប់ រដ្ឋាករទឹកស្វយ័តក្រុងភ្នំពេញ បាននាំមកនូវភាពជោគជ័យជូនរាជរដ្ឋាភិបាលក្នុងការកែទម្រង់វិស័យផ្គត់ផ្គង់ទឹកស្អាត ក្រោមការដឹកនាំប្រកបដោយគតិបណ្ឌិតខ្ពង់ខ្ពស់ ចក្ខុវិស័យត្រឹមត្រូវ មុតស្រួចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលធ្វេីឲ្យរដ្ឋាករទឹកស្វយ័តក្រុងភ្នំពេញទទួលបានពានរង្វាន់ជាបន្តបន្ទាប់ជាអន្តរជាតិ ផ្នែកវិស័យទឹកស្អាត។

ឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានបង្ហាញនូវក្តីសង្ឃឹមថា៖តាមរយះចំណេះដឹង និងបទពិសោធន៍ជាយូរឆ្នាំ របស់ឯកឧត្តម ឡុង ណារ៉ូ នឹងខិតខំដឹកនាំគ្រប់គ្រង រក្សាសមិទ្ធផល និងអភិវឌ្ឍន៍អង្គភាពរដ្ឋាករទឹកស្វយ័តក្រុងភ្នំពេញឲ្យកាន់តែរីកចម្រេីនទៅមុខជាលំដាប់ ក្នុងគោលដៅសម្រេចឲ្យបាននៅឆ្នាំ២០២៥ ទីប្រជុំជននឹងទទួលបានទឹកស្អាត១០០% និងឆ្នាំ២០៣០ គឺទឹកស្អាតសម្រាប់ទាំងអស់គ្នា ។ ជាពិសេស ចំពោះមុខគឺការដោះស្រាយការផ្គត់ផ្គង់ទឹកស្អាតក្នុងរាជធានីភ្នំពេញ ដែលប្រជាជន និងផ្ទៃក្រឡាទីក្រុងកំពុងរីកធំឡេីង ហេីយក៏មានគម្រោងកិច្ចសហការនិងអភិវឌ្ឍន៍នៅតាមបណ្តាខេត្តមួយចំនួនផងដែរ ។