ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចមប្រសិទ្ធ អញ្ជេីញជាអធិបតីក្នុងពិធីប្រកាសផ្ទេរ តែងតាំងមុខតំណែងរដ្ឋលេខាធិការ និងមន្ត្រីជាន់ខ្ពស់នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចមប្រសិទ្ធ អញ្ជេីញជាអធិបតីក្នុងពិធីប្រកាសផ្ទេរ តែងតាំងមុខតំណែងរដ្ឋលេខាធិការ និងមន្ត្រីជាន់ខ្ពស់នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
--------------------------------------------
ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅរសៀលថ្ងៃទី ៣០ ខែសីហា ឆ្នាំ២០២១ បានអញ្ជេីញជាអធិបតី ក្នុងពិធីប្រកាសតែងតាំងមុខតំណែងរដ្ឋលេខាធិការ និងមន្ត្រីជាន់ខ្ពស់នៃក្រសួងឧស្សាហកម្មវិទ្យាសាស្ត្រ បច្ចេកវិទ្យានិងនវានុវត្តន៍ សរុបចំនួន០៨ រូប ។ កម្មវិធីនេះត្រូវបានប្រារព្វធ្វើនៅទីស្តីការក្រសួង និងតាមប្រព័ន្ធអនឡាញ ដេីម្បីអនុវត្តតាមវិធានសុខាភិបាល ។
តាមការអានព្រះរាជក្រឹត្យ និងអនុក្រឹត្យតែងតាំងដោយ ឯកឧត្តម ជួរ ជេតទីវន្ត ទីប្រឹក្សាក្រសួង និងជាអគ្គនាយករងនៃអគ្គនាយកដ្ឋានកិច្ចការទូទៅ គឺត្រូវបានផ្ទេរនិងតែងតាំង ១-ឯកឧត្តម កាន ច័ន្ទមេត្តា ពីរដ្ឋលេខាធិការក្រសួងប្រៃសណីយ៍និងទូរគមនាគមន៍ មកជា រដ្ឋលេខាធិការនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ២-តែងតាំងមុខតំណែងឯកឧត្ដម សុឹម សុីថា នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ៣-តែងតាំងលោកស្រី ប៉េង ដាវុធកល្យាណ ជាអគ្គនាយករង នៃអគ្គនាយកដ្ឋានសហគ្រាសធនតូចនិងមធ្យម និងសិប្បកម្ម ជំនួសលោក ស៊ូ វ៉ាន់នី ដែលបានលាឈប់ពីការងារ ៤-តែងតាំង លោកស្រី ទេព រ៉ានី ជាប្រធាននាយកដ្ឋានផែនការ និងជម្រុញការអភិវឌ្ឍន៍សហគ្រាសធុនតូច និងមធ្យម ជំនួសលោកស្រី ប៉េងដាវុធកល្យាណ ដែលត្រូវទទួលភារកិច្ចថ្មី ៥-តែងតាំងលោក សេង ឆាង ជាអគ្គនាយករង នៃវិទ្យាស្ថានស្តង់ដារកម្ពុជា ជំនួសឯកឧត្ដម ចាន់ សុផា ដែលបានទទួលភារកិច្ចថ្មី ៦-តែងតាំងលោក សោម សិទ្ធិ ជាអគ្គនាយករងនៃវិទ្យាស្ថានស្តង់ដារកម្ពុជា ជំនួសលោក អុិន សំបូរ ដែលបានទទួលភារកិច្ចថ្មី ៧-តែងតាំងលោក ជា ថារក្ស ជាប្រធាននាយកដ្ឋានវិញ្ញាបនបត្រកម្ម នៃវិទ្យាស្ថានស្តង់ដារកម្ពុជា ជំនួសលោកសេង ឆាង ដែលបានទទួលភារកិច្ចថ្មី និង៨-តែងតាំង លោក ស៊ុយ វុន្នី ជាប្រធាននាយកដ្ឋានបញ្ញត្តកម្មទឹកស្អាត នៃអគ្គនាយកដ្ឋានទឹកស្អាត ជំនួសលោក សោម សិទ្ធិ ដែលត្រូវទទួលភារកិច្ចថ្មី ។
មានប្រសាសន៍សំណេះសំណាលក្នុងអង្គពិធី ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានរំលឹកនិងទាញអារម្មណ៍ថា ក្នុងរាជរដ្ឋាភិបាលអណត្តិទី៥នេះ ក្រសួងឧស្សាហកម្ម និងសិប្បកម្ម ត្រូវបានបំបែកចេញពីអតីតក្រសួង ឧស្សាហកម្ម រ៉ែ និងថាមពល និងតមកទៀត ក្រសួងក៏ត្រូវប្តូរឈ្មោះជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយត្រូវបន្ថែមមុខងារ វិទ្យាសាស្ត្រ បច្ចេកវិទ្យា និងនវានុវត្តន៍ ដែលមានវិសាលភាពធំធេង ។ ដូច្នេះតាំងពីដេីមរៀងមក គឺយេីងបានខិតខំប្រឹងប្រែងជំនះការលំបាករាប់មិនអស់ រហូតយេីងមានថ្ងៃនេះ ដែលយេីងអាចចាត់ទុកថា យេីងកសាងបាននូវសមិទ្ធិផល និងធនធានមនុស្សប្រកបដោយសក្តានុពល ហេីយកំពុងត្រៀមជំនះនូវបញ្ហាជាច្រេីនទៀត ដេីម្បីឆ្លេីយតបនិងគុណបំណាច់ក៏ដូចជាទំនុកចិត្តដែលរាជរដ្ឋាភិបាលបានផ្តល់មកយេីងទាំងអស់គ្នា ។ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានសង្កត់ធ្ងន់ថា៖ អ្នកដែលត្រូវទទួលបានការតែងតាំងពិតណាស់មិនអាចបំភ្លេចនូវគុណបំណាច់ដ៏ថ្លៃថ្លារបស់ប្រមុខរាជរដ្ឋាភិបាលសម្តេចតេជោនាយករដ្ឋមន្ត្រីឡេីយ ពីព្រោះរាល់សំណេីរតែងតាំងដែលខ្ញុំស្នេីឡេីងជូនសម្តេច គឺសម្តេចតេជោនាយករដ្ឋមន្ត្រី មិនដែលបដិសេធម្តងណាឡេីយ ។ នេះសបញ្ជាក់ឲ្យឃេីញពីការយកចិត្តទុកដាក់ដ៏ខ្ពង់ខ្ពស់របស់ប្រមុខរាជរដ្ឋាភិបាលយេីងដែលមានចក្ខុវិស័យវែងឆ្ងាយ មុតស្រួច ក្នុងការ ប្រមូលធនធានចំណេះដឹងនៃបញ្ញាវន្តខ្មែរមកចូលរួមអភិវឌ្ឍប្រទេសជាតិទាំងអស់គ្នា ។ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានបញ្ជាក់ថា៖ការផ្ទេរ និងតែងតាំងមុខតំណែង ជារដ្ឋលេខាធិការចំនួន២រូបខាងលេី គឺជាតម្រូវការចាំបាច់មួយ ពីព្រោះឯកឧត្តម កាន ច័ន្ទមេត្តា គាត់មានជំនាញនិងបទពិសោធន៍លេីវិស័យវិទ្យាសាស្ត្រ ដែលអាចមកជួយក្រសួងរបស់យេីងបាន រួមជាមួយឯកឧត្តមជាថ្នាក់ដឹកនាំដ៏ទៃទៀត ។ ចំណែកឯកឧត្តម សុឹម សុីថា គាត់មានជំនាញផ្នែកវិស័យទឹកស្អាត ដែលជាការងារដ៏សំខាន់របស់ក្រសួងទាំងពេលបច្ចុប្បន្ននិងអនាគត ។ ចំពោះការតែងតាំងមន្ត្រីជាន់ខ្ពស់ក្រសួងចំនួន០៦ រូបទៀត ។ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី បានសង្កត់ធ្ងន់ថា៖ការតែងតាំងនេះ មិនមានការសូកប៉ាន់ ឬអន្តរាគមន៍ណាមួយទេ និងសូមបញ្ជាក់ថា មន្ត្រីខ្លះ មិនទាំងដឹងខ្លួនពីការតែងតាំងនេះផង ។ ការតែងតាំងនេះ គឺផ្អែកលេីសមិទ្ធផលការងារ អត្តចារិក ចំណេះជំនាញ និងបទពិសោធន៍ការងាររបស់បុគ្គលម្នាក់ៗសុទ្ធសាធ ហេីយ៨០%គឺយេីងផ្អែកទៅលេីការបោះឆ្នោតស្ទង់មតិភ្នែកមហាជន ដែលក្រសួងបានធ្វេីក្នុងមួយឆ្នាំ២ដងផងដែរ ។
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ សូមណែនាំជាឱឡារិកថា មុខតំណែង តួនាទី ភារកិច្ច ដែលរាជរដ្ឋាភិបាលផ្តល់ឲ្យយេីងនេះ គឺជាទំនុកចិត្តរបស់រាជរដ្ឋាភិបាល ដែលគ្រប់គ្នាមានភារកិច្ចធ្វេីការបម្រេីជាតិមាតុភូមិ ដោយភាពស្មោះត្រង់និងការទទួលខុសត្រូវខ្ពស់ ដោយប្រេីប្រាស់ចំណេះជំនាញរបស់ខ្លួនឲ្យអស់លទ្ធភាព ។ ក្នុងនោះ បេីបានទទួលតំណែងក្នុងមុខនាទីក្នុងការសម្រេចចិត្តមួយហេីយ ត្រូវសម្លឹងមេីលកូនចៅថ្នាក់ក្រោម តេីនរណាសកម្ម ?និងនរណា ខ្ជិលច្រអូស អសកម្ម? ដេីម្បីយេីងមានវិធានការជាក់ស្តែង លេីកទឹកចិត្ត និងផ្តល់តួនាទីបន្ថែមជាដេីម ។ ជាពិសេស ក្នុងដំណាក់កាលនៃវិបត្តិកូវីដ-១៩នេះ ដាច់ខាតមិនត្រូវផ្តេកផ្តួលតាមសភាពការណ៌នេះឡេីយ ដូចជា ទុកឯកសារគរចោល និងព្រងេីយកន្តេីយការងារសំខាន់ៗជាច្រេីនទៀត ពីព្រោះប្រទេសជាតិក្នុងដំណាក់កាលនេះ ត្រូវការភាពផុលផុសទាំងអស់គ្នា ដោយយេីងត្រូវមេីលគម្រូវីរៈភាពដ៏អស្ចារ្យ និងថ្លៃថ្លារបស់សម្តេចប្រមុខរាជរដ្ឋាភិបាល ដែលសម្តេចបានខិតខំទាំងយប់ទាំងថ្ងៃ មិនខ្លាចនឿយហត់ ក្នុងមួយជីវិតរបស់សម្តេចដេីម្បីបុព្វហេតុជាតិ មាតុភូមិ ភាពរស់រាន និងការអភិវឌ្ឍន៍ប្រទេសជាតិឥតឈប់ឈរ ។