សិក្ខាសាលាពិគ្រោះយោបល់ចុងក្រោយលេីសេចក្តីព្រាងផែនការយុទ្ធសាស្ត្រនិងផែនការសកម្មភាពប្រសិទ្ធិភាពធនធាននិងផលិតកម្មស្អាតសម្រាប់វិស័យឧស្សាហកម្មនិងសហគ្រាសធុនតូចនិងមធ្យមឆ្នាំ២០២១-២០៣០

------------------------------------------------

ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅរសៀលថ្ងៃទី ០២កញ្ញា ឆ្នាំ២០២១ បានអញ្ជេីញធ្វេីជាអធិបតីក្នុងសិក្ខាសាលាពិគ្រោះយោបល់ចុងក្រោយលេីសេចក្តីព្រាងផែនការយុទ្ធសាស្ត្រនិងផែនការសកម្មភាពប្រសិទ្ធិភាពធនធាននិងផលិតកម្មស្អាតសម្រាប់វិស័យឧស្សាហកម្មនិងសហគ្រាសធុនតូចនិងមធ្យមឆ្នាំ២០២១-២០៣០ នៅទីស្តីការក្រសួង និងតាមប្រព័ន្ធអនឡាញ ដោយមានការចូលរួមពីជំនាញការអង្គការអភិវឌ្ឍឧស្សាហកម្មសហប្រជាជាតិ UNIDO ,ឯកឧត្តម សុខ ណារិន ប្រធានតំណាងអង្គការUNIDO ប្រចាំកម្ពុជា ,ថ្នាក់ដឹកនាំនិងមន្ត្រីជំនាញក្រោមឱវាទក្រសួង តំណាងក្រសួងពាក់ព័ន្ធ វិស័យឯកជន អង្គការ សមាគម និងដៃគូអភិវឌ្ឍន៍សរុបចំនួនប្រមាណ១០០រូប ។

សូមបញ្ជាក់ថា៖ឯកសារដែលនឹងលេីកមកពិភាក្សា ហេីយ

ត្រូវធ្វេីបទបង្ហាញដោយលោក Neeraj Ramchandran អ្នកជំនាញមកពីអង្គការ PwC នៃប្រទេសឥណ្ឌា នាពេលបន្តិចទៀតនេះ គឺជាពង្រាងចុងក្រោយនៃយុទ្ធសាស្រ្តនិងផែនការសកម្មភាពនៃផលិតកម្មស្អាតនិងប្រសិទ្ធភាពធនធាន សម្រាប់វិស័យឧស្សាហកម្ម ដែលរៀបរៀងដោយក្រុមការងាររបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) និងក្រសួងបរិស្ថាន (MoE) និងដោយមានអ្នកចូលរួមមកពីវិស័យសាធារណៈនិងឯកជននានា ដែលសម្របសម្រួលដោយក្រុមអ្នកជំនាញមកពី Price, Waterhouse និង Coopers (PwC)ក្រោមការដឹកនាំនិងការណែនាំពីឯកឧត្តមទេសរដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ផែនការយុទ្ធសាស្ត្រនិងផែនការសកម្មភាពនេះមានយុទ្ធសាស្ត្រអាទិភាពសំខាន់ៗគឺ ដើម្បីពង្រឹងបទប្បញ្ញត្តិបទដ្ឋានគតិយុត្តិ និងការរាយការណ៍ប្រមូលទិន្នន័យ លើកកម្ពស់គំរូកម្មវិធីប្រសិទ្ធភាពធនធាន និងផលិតកម្មស្អាតឱ្យកាន់តែរីកចម្រើន មានវិសាលភាពធំ ជំរុញការច្នៃប្រឌិតសហគ្រិនភាព និងការពង្រឹងសមត្ថភាពដើម្បីអនុវត្តប្រសិទ្ធភាពធនធាន និងផលិតកម្មស្អាត។

ផែនការនេះមានរយៈពេល ១០ ឆ្នាំត្រូវបានបែងចែកជា ៣ ដំណាក់កាល រយៈពេលខ្លី (២០២១ - ២០២៣), រយៈពេលមធ្យម (២០២៣ - ២០២៧) និងរយៈពេលវែង (២០២៧ - ២០៣០) ។

លោកស្រី Nilguen tas ប្រធាន និងជានាយករងទទួលបន្ទុកប្រសិទ្ធិភាពធនធានឧស្សាហកម្ម នៃអង្គការ UNIDO បានបង្ហាញពីចំណាប់អារម្មណ៍ ដោយលេីកឡេីងថា បច្ចុប្បន្ននេះ យេីងដឹងច្បាស់អំពីបញ្ហាប្រឈមជាសាកលដែលមានទំនាក់ទំនងគ្នាចំនួន៣ គឺការប្រែប្រួលអាកាសធាតុ ការបាត់បង់ជីវ:ចម្រុះ និងការបំពុលបរិស្ថាន ដែលគម្រាមកំហែងដល់សុខភាព វិបុលភាព និងសុខុមាលភាពរបស់មនុស្សជំនាន់ក្រោយ និងអនាគតរបស់យេីង ។ កិច្ចការនេះតម្រូវឲ្យមានកិច្ចសហការ និងការចូលរួមពីគ្រប់ភាគី ហេីយវិស័យឧស្សាហកម្មនិងសហគ្រាសធុនតូចនិងមធ្យមត្រូវគេមេីលឃេីញថា មានការទទួលខុសត្រូវលេីបញ្ហានេះជាចម្បង ដែលត្រូវតែមានផែនការយុទ្ធសាស្ត្រ និងផែនការសកម្មភាពរបស់ខ្លួន ដេីម្បីធានាថាយេីងទាំងអស់គ្នារួមចំណែកក្នុងការការពារបរិស្ថាន និងសេវាកម្មប្រព័ន្ធអេកូឡូសុីរបស់យេីង ។

បន្ទាប់ពីឯកឧត្តមបណ្ឌិតទឹង សុីនី រដ្ឋលេខាធិការក្រសួង ឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ មានប្រសាសន៍ស្វាគមន៍និងចំណាប់អារម្មណ៌រួចមក ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានអញ្ជេីញមានប្រសាសន៍បេីកអង្គសិក្ខាសាលា ដោយបានសម្តែងនូវអំណរអរគុណដល់អង្គការ UNIDO និងដៃគូសហការទាំងអស់ដែលខិតខំកសាងបាននូវសេចក្តីព្រាងផែនការយុទ្ធសាស្ត្រនិងផែនការសកម្មភាពប្រសិទ្ធិភាពធនធាននិងផលិតកម្មស្អាតសម្រាប់វិស័យឧស្សាហកម្មនិងសហគ្រាសធុនតូចនិងមធ្យមឆ្នាំ២០២១-២០៣០ ដែលយកមកពិគ្រោះយោបល់ចុងក្រោយនាថ្ងៃនេះ សង្ឃឹមថាយេីងនឹងធាតុចូលបន្ថែមទៀត ពីព្រោះអន្តរាគមន៍របស់ប្រសិទ្ធិភាពធនធាននិងផលិតកម្មស្អាតបានផ្តល់ជាគម្រូថ្មីនឹងជួយប្រទេសកម្ពុជាមិនត្រឹមតែក្នុងការធ្វេីឲ្យមាននិរន្តរភាពនៃឧស្សាកម្មរបស់យេីងប៉ុណ្ណោះទេ ប៉ុន្តែថែមទាំងជួយបង្កើនសុខុមាលភាពមនុស្ស និងកំណេីនសេដ្ឋកិច្ចព្រមទាំងកាត់បន្ថយចំនួនធនធានដែលត្រូវការសម្រាប់ផលិតកម្ម និងផលប៉ះពាល់បរិស្ថានទាក់ទងនិងការប្រេីប្រាស់ធនធាន ។ ប្រទេសកម្ពុជាត្រូវតែរួមបញ្ចូលការប្រើប្រាស់ធនធានប្រកបដោយនិរន្តរភាព ដេីម្បីទ្រទ្រង់កំណេីនរយៈពេលវែងរបស់ខ្លូននិងសម្រេចបានគោលដៅក្លាយជាប្រទេសមានចំណូលមធ្យមកំរិតខ្ពស់នៅឆ្នាំ២០៣០ ។ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានបន្ថែមថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ប្តេជ្ញាគាំទ្ររាល់ធនធាននិងការខិតខំប្រឹងប្រែងរបស់ខ្លួនក្នុងការធ្វេីការជាមួយអ្នកពាក់ព័ន្ធទាំងអស់ដើម្បីសម្រេចបាននូវចក្ខុវិស័យឧស្សាហកម្មបៃតង និងបេសកកម្មដេីម្បីជួយឲ្យការគ្រប់គ្រងប្រកបដោយនិរន្តរភាពនៃធនធាន និងកាត់បន្ថយលប៉ះពាល់បរិស្ថាននៃវិស័យឧស្សាហកម្មនៃប្រទេសកម្ពុជា ។

ក្នុងនាមរាជរដ្ឋាភិបាល និងក្រសួង ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានថ្លែងអំណរគុណសាតជាថ្មីដល់អង្គការ UNIDO និងអ្នកពាក់ព័ន្ធទាំងអស់ដែលបានសហការគាំទ្រកសាងបាននូវឯកសារដ៏សំខាន់នេះដេីម្បីជាផែនទីបង្ហាញផ្លូវសម្រាប់ប្រសិទ្ធភាពធនធាន និងការអភិវឌ្ឍន៍កាបូនទាបនៅកម្ពុជា ។