ពិធីចុះហត្ថលេខាលេីលិខិតប្រគល់-ទទួលអគារ មន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍(ម.ជ.វ.ប.ន)
ពិធីចុះហត្ថលេខាលេីលិខិតប្រគល់-ទទួលអគារ
មន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍(ម.ជ.វ.ប.ន) និងធ្វេីការជួសជុលកែលម្អរអគ្គនាយកដ្ឋានឧស្សាហកម្មនៅក្នុងទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍
....................................................................
ដោយមានការអនុញ្ញាត និងការសម្រេចពីឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅរសៀលថ្ងៃទី ០៣ ខែមីនា ឆ្នាំ២០២១ មានរៀបចំពិធីចុះហត្ថលេខាលេីលិខិតប្រគល់-ទទួលអគារមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍(ម.ជ.វ.ប.ន) ដែលមានទីតាំងស្ថិតនៅតាមបណ្តោយផ្លូវជាតិលេខ២ សង្កាត់ ចាក់អង្រែលើ ខណ្ឌមានជ័យ រាជធានីភ្នំពេញនិងធ្វេីការជួសជុលកែលម្អរអគ្គនាយកដ្ឋានឧស្សាហកម្មនៅក្នុងទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្រោមវត្តមានឯកឧត្ដម ឆែម គាតរិទ្ធី រដ្ឋមន្រ្តីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងឯកឧត្តម គឹម ទូច រដ្ឋលេខាធិការនិងជាប្រធានគណ:កម្មកាសាងសង់ ។
មានប្រសាសន៍នាឱកាសនោះ ឯកឧត្ដម ឆែម គាតរិទ្ធី ជារដ្ឋលេខាធិការទទួលបន្ទុកវិស័យវិទ្យាសាស្ត្រ បច្ចេកវិទ្យា និងនវានុវត្តន៍ និងឯកឧត្តមរដ្ឋលេខាធិការ គឹម ទូច ជាប្រធានគណ:កម្មកាសាងសង់បានចាត់ទុកថ្ងៃនេះ ជាថ្ងៃប្រវត្តិសាស្ត្រមួយ ដែលក្រសួងក្រោមការដឹកនាំរបស់ឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រី ចម ប្រសិទ្ធ ជាពិសេសក្រោមចក្ខុវិស័យដ៏មុតស្រួចនិងប្រកបដោយកិត្តិបណ្ឌិតដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាអគារមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍(ម.ជ.វ.ប.ន) ត្រូវបានលេចជារូបរៀងឡេីងប្រកបដោយសោភ័ណ្ឌភាព និងគុណភាពសម្រាប់ឲ្យថ្នាក់ដឹកនាំនិងមន្ត្រីផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ដែលជាស្នូលនៃ សេដ្ឋកិច្ចជាតិ ហេីយទទួលទំនុកចិត្តនិងការតែងតាំងពីរាជរដ្ឋាភិបាលមានកន្លែងបំពេញការងារសមរម្យកក់ក្តៅ និងប្រកបដោយកិត្តិយស ។ ទោះបីអតីតក្រសួងឧស្សាហកម្ម និងសិប្បកម្ម ទេីបប្តូរឈ្មោះទៅជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍កាលពីខែមិនា ឆ្នាំ២០២០ ហេីយកំពុងស្ថិតក្នុងដំណាក់កាលនៃរីករាលដាលនៃមេរោគឆ្លងកូវីដ-១៩ ជាសាកលក៏ដោយ ។
ឯកឧត្តមរដ្ឋលេខាធិការ បានកោតសរសេីរចំពោះក្រុមហ៊ុន លី ឈួង សំណង់ & អាហរ័ណ នីហរ័ណ ដែលយេីងអាចចាត់ទុកថាជាក្រុមហ៊ុនសំណង់ក្នុងស្រុកដ៏ធំ និងល្បីនៅកម្ពុជា បានអនុវត្តការសាងសង់ដោយបញ្ចប់ជាស្ថាពរហេីយគោរពបានត្រឹមត្រូវតាមកិច្ចសន្យា ។ ជាពិសេសក៏បានថ្លែងអំណរគុណ និងកោតសរសេីរ ចំពោះឯកឧត្តម សឺន សូថា ប្រតិភូរាជរដ្ឋាភិបាលកម្ពុជា អគ្គនាយកនៃអគ្គនាយកនៃអគ្គនាយកដ្ឋានកិច្ចការទូទៅរបស់ក្រសួង និងជាអនុប្រធានប្រចាំការនៃណ:កម្មការសាងសង់ បានដឹកនាំ មន្ត្រីបច្ចេកទេសក្រោមឱវាទ ដោយខិតខំពន្លឿនកិច្ចការងារ និងដោះស្រាយបញ្ហាចំពោះមុខបានទាន់ពេលវេលា និងជាបណ្តេីរៗ ដូចជា៖ការបំពាក់សម្ភារ:ការិយាល័យ សន្តិសុខយាមកាម សម្ភារៈបន្ទប់ទឹក បុគ្គលិកអនាម័យ និងបំពាក់ម៉ាសុីននិងសម្ភារ:ការពារមេរោគកូវីដ-១៩ ជាដេីម ស្របតាមការណែនាំចង្អុលបង្ហាញរបស់ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តីរដ្ឋមន្ត្រី ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ។
សូមបញ្ជាក់ថា៖នៅក្នុងខ្លឹមសារហត្ថលេខានៃលិខិតប្រគល់-ទទួល បានចែងដូចជា៖យោងកិច្ចសន្យាចុះថ្ងៃទី១០ ខែកញ្ញា ឆ្នាំ២០១៨ រវាងក្រសួងឧស្សាហកម្ម និងសិប្បកម្ម ជាមួយ ក្រុមហ៊ុន លី ឈួងសំណង់ & អាហរ័ណនីហរ័ណ អគារមន្ទីរពិសោធន៍ជាតិវិទ្យាសាស្ត្រ បច្ចេកវិទ្យា និងនវានុវត្តន៍(ម.ជ.វ.ប.ន) ដែលមានទំហំ៤.៨០០ម៉ែត្រការ៉េ កំពស់៧ជាន់ នៅក្នុងទីតាំងអតីតរោងចក្រកៅស៊ូកង់ទី១ និងការងារធ្វេីការជួសជុលកែលម្អរអគារអគ្គនាយកដ្ឋានឧស្សាហកម្មនៅក្នុងទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ត្រូវបានរៀបចំពិធីប្រគល់-ទទួលរវាងក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ ហៅកាត់ "អ្នកម្ចាស់ការ" តំណាងដោយឯកឧត្តម សឺន សូថា អគ្គនាយកនៃអគ្គនាយកដ្ឋានកិច្ចការទូទៅ និងក្រុមហ៊ុន លី ឈួង សំណង់ & អាហរ័ណ នីហរ័ណ ហៅកាត់ "អ្នកទទួលការ"តំណាងដោយលោកឧកញ៉ា លី ឈួង អគ្គនាយកក្រុមហ៊ុន លី ឈួង សំណង់ & អាហរ័ណ នីហរ័ណ ដែលបានអនុវត្តបញ្ចប់ការសាងសង់សម្រេចជាស្ថាពរ១០០% ត្រឹមត្រូវតាមបទដ្ឋានបច្ចេកទេស និងគំនូសប្លង់ស្របតាមកិច្ចសន្យា ។