កិច្ចប្រជុំស្តីពីការបង្កើតគណៈកម្មការអន្តរក្រសួងដេីម្បីរៀបចំតាក់តែងសេចក្តីព្រៀងច្បាប់ស្តីពី៖ ការគ្រប់គ្រងទំនិញគ្រោះថ្នាក់
កិច្ចប្រជុំស្តីពីការបង្កើតគណៈកម្មការអន្តរក្រសួងដេីម្បីរៀបចំតាក់តែងសេចក្តីព្រៀងច្បាប់ស្តីពី"ការគ្រប់គ្រងទំនិញគ្រោះថ្នាក់"
យោងតាមការសម្រេចរបស់រាជរដ្ឋាភិបាលលេខ៥៧២ស.ជ.ណ.មយ ចុះថ្ងៃទី ១៨ ខែកក្កដា ឆ្នាំ២០២២ ដែលបានយល់ព្រមជាគោលការណ៍ឲ្យបង្កេីតគណៈកម្មការអន្តរក្រសួងដេីម្បីរៀបចំតាក់តែងសេចក្តីព្រៀងច្បាប់ស្តីពី"ការគ្រប់គ្រងទំនិញគ្រោះថ្នាក់" នៅរសៀលថ្ងៃទី ០១ ខែកញ្ញា ឆ្នាំ២០២២ ឯកឧត្ដមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍និងឯកឧត្តម កេីត រិទ្ធ រដ្ឋមន្រ្តីក្រសួងយុត្តិធម៌ដែលត្រូវបានតែងតាំងជាសហប្រធាន បានអញ្ជេីញជាអធិបតីបេីកកិច្ចពិភាក្សាជុំវិញការបង្កើតគណៈកម្មការអន្តរក្រសួងដេីម្បីរៀបចំតាក់តែងសេចក្តីព្រៀងច្បាប់ស្តីពី"ការគ្រប់គ្រងទំនិញគ្រោះថ្នាក់" នៅទីស្តីការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយមានតំណាងក្រសួងស្ថាប័នពាក់ព័ន្ធចំនួន១៨ ចូលរួម។
មានប្រសាសន៍នាឱកាសនោះ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានលេីកឡេីងពីសាវតានៃការពិភាក្សាសេចក្តីព្រៀងច្បាប់ស្តីពី"ការគ្រប់គ្រងទំនិញគ្រោះថ្នាក់"នេះ តាំងពីឆ្នាំ២០១៦ និង២០១៧ តែត្រូវបានជាប់គាំង ដោយសារពាក់ព័ន្ធនឹងការជាន់សមត្ថកិច្ចគ្នាក្នុងការអនុវត្តច្បាប់ ។ ដោយឡែកសម្រាប់កិច្ចប្រជុំនាថ្ងៃនេះ គឺយេីងត្រូវធ្វេីបច្ចុប្បន្នភាពឡេីងវិញនូវសមាសភាពគណៈកម្មការអន្តរក្រសួងដេីម្បីរៀបចំតាក់តែងសេចក្តីព្រៀងច្បាប់ស្តីពី"ការគ្រប់គ្រងទំនិញគ្រោះថ្នាក់" និងការបង្កេីតក្រុមការងារបច្ចេកទេសមួយជាសេនាធិការបម្រេីឲ្យការងារនេះអាចលេចចេញជារូបរៀងឲ្យបានឆាប់រហ័ស ទាន់ពេលវេលាសម្រាប់ជាផលប្រយោជន៍ជាតិរួម ។
បន្ទាប់ពីបានធ្វេីបច្ចុប្បន្នភាពសមាសភាពគណៈកម្មការអន្តរក្រសួងបានមួយចំនួនធំរួចមក ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ និងឯកឧត្តម កេីត រិទ្ធ រដ្ឋមន្ត្រីក្រសួងយុត្តិធម៌ ក្នុងនាមជាសហប្រធាននៃកិច្ចប្រជុំ បានបង្ហាញនូវជំហររួមគ្នាដោយបញ្ជាក់ថា៖ដោយពិនិត្យឃេីញពីតម្រូវការចាំបាច់ក្នុងការបន្តឲ្យមានកំណេីនសេដ្ឋកិច្ចជាតិ ការការពារសុខមាលភាព សុវត្ថិភាពសាធារណៈ បរិស្ថាន និងសង្គម ប្រកបដោយការទទួលខុសត្រូវ និងមានប្រសិទ្ធភាពខ្ពស់ ជាពិសេសការគ្រប់គ្រងទំនិញ និងសារធាតុគ្រោះថ្នាក់ ដេីម្បីបញ្ចៀសរាល់មហន្តរាយដែលអាចកេីតមានឡេីងជាយថាហេតុ ច្បាប់ស្តីពី"ការគ្រប់គ្រងទំនិញគ្រោះថ្នាក់" ត្រូវតែបង្កើតឡេីងឲ្យបានជាប្រញ៉ាប់តាមដែលអាចធ្វេីបាន ពីព្រោះច្បាប់នេះ មានវិសាលភាពក្នុងការត្រួតពិនិត្យ ការផលិត ការប្រេីប្រាស់ ការនាំចូល ការនាំចេញ ការដឹកជញ្ជូន និងការស្តុកទំនិញគ្រោះថ្នាក់ដែលអាចបង្កមហន្តរាយដល់មនុស្ស សត្វ បរិស្ថាន និងសន្តិសុខសង្គម ។ ជាពិសេសគឺទប់ស្កាត់ឲ្យបានជាអតិបរមាពីការផលិតគ្រឿងញៀន យកចេញពីសារធាតុគីមីផ្សំនាំចូល ដែលពិតជាគ្រោះថ្នាក់និងមានការប៉ះពាល់យ៉ាងធ្ងន់ធ្ងរដល់សង្គមជាតិទាំងមូល ។