កម្មវិធី "ពានរង្វាន់ឧស្សាហកម្មបៃតងកម្ពុជា ឆ្នាំ២០២៣"
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សហការជាមួយអង្គការ UNIDO បានរៀបចំកម្មវិធី "ពានរង្វាន់ឧស្សាហកម្មបៃតងកម្ពុជា ឆ្នាំ២០២៣" កាលពីថ្ងៃទី ២១ ខែកញ្ញា ឆ្នាំ ២០២៣ នៅទីស្តីការក្រសួង។ កម្មវិធីនេះបានផ្តល់ពានរង្វាន់ដល់ក្រុមហ៊ុនចំនួន២០ ដែលបានទទួលយកទៅអនុវត្តនូវបច្ចេកវិទ្យាដែលអំណោយផលល្អដល់បរិស្ថាន ដើម្បីបង្កើនប្រសិទ្ធភាពដំណើរការ កាត់បន្ថយកាកសំណល់ និងផលប៉ះពាល់បរិស្ថានក្នុងប្រតិបត្តិការរបស់ខ្លួន។
ក្នុងចំណោមក្រុមហ៊ុនដែលទទួលជ័យលាភី ក្រុមហ៊ុនចំនួន៦ទទួលបានពានមាស ៧ក្រុមហ៊ុនទទួលបានពានប្រាក់ និង៧ក្រុមហ៊ុនទទួលពានសំរឹទ្ធ។ ក្រសួងសូមអបអរសាទរដល់ក្រុមហ៊ុនដែលទទួលបានជ័យលាភី និងលើកទឹកចិត្តដល់គ្រប់មូលដ្ឋានអាជីវកម្ម ឧស្សាហកម្ម និងសិប្បកម្ម ឱ្យទទួលយកគោលការណ៍ និងបច្ចេកវិទ្យាដែលអំណោយផលល្អដល់បរិស្ថានទៅអនុវត្ត ដើម្បីរួមចំណែកដល់ការធ្វើឱ្យវិស័យឧស្សាហកម្មកម្ពុជាកាន់តែបៃតង សម្រាប់ការអភិវឌ្ឍប្រកបដោយចីរភាព និងបរិយាប័ន្ន។