ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ជួបប្រតិភូសមាគមកាបូប ស្បែកជើង និងអេឡិចត្រូនិច(BSEA)
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ជួបប្រតិភូសមាគមកាបូប ស្បែកជើង និងអេឡិចត្រូនិច(BSEA)
នៅព្រឹកថ្ងៃទី ៣១ តុលា ឆ្នាំ២០២២ ឯកឧត្ដមកិត្តិសេដ្ឋាបណ្ឌិតចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបប្រតិភូ សមាគមកាបូប ស្បែកជើង និងអេឡិចត្រូនិចកម្ពុជា ហៅកាត់ថា "BSEA” ដេីម្បី សម្តែងការគួរសមនិងពិភាក្សាការងារនៅទីស្តីការក្រសួង ។
លោក ចេង ជីជុន(Cheng Chi Chun) ជាប្រធានសមាគម និងជានាយកក្រុមហ៊ុន KUANTECH (CAMBODIA)INTERNATIONAL CO.,LTD បានជម្រាបជូនពីសាវតា គោលបំណងនៃជំនួបពិភាក្សានិងចក្ខុវិស័យរបស់សមាគមដោយបានបញ្ជាក់ថា៖សមាគមបានចុះបញ្ជីកាជាមួយក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១៩ ខែសីហា ឆ្នាំ២០២២។បច្ចុប្បន្ននេះ BSEA មានសមាជិកពេញសិទ្ធិចំនួន១៧នាក់ ដោយសារ BSEA ជា សមាគមនិយោជកថ្មីថ្មោងមួយដែលទើបតែបង្កើតឡើង ហេតុដូច្នេះសមាគម នៅមានចំណុចខ្វះខាតជាច្រើនដែលត្រូវសិក្សាស្វែងយល់ រៀនសូត្រ និងអភិវឌ្ឍបន្ថែមទៀត ជាពិសេសការជួយជ្រោមជ្រែង និងចង្អុលបង្ហាញពី ឯកឧត្តមកិត្តិសេដ្ឋាបណ្ឌិត ទេសរដ្ឋមន្ត្រី ពីព្រោះ ឯកឧត្តមជាឥស្សរជនដ៏ឆ្នើមមួយរូបរបស់ប្រទេសកម្ពុជាដែលមានបទពិសោធន៍ ជំនាញ និងចំណេះដឹងយ៉ាងច្រើនពាក់ព័ន្ធទៅនឹងបច្ចេកវិទ្យា វិទ្យាសាស្ត្រ និងនវានុវត្តន៏ ជាពិសេសកិច្ចការពាណិជ្ជកម្ម ការគាំទ្រការនាំចេញ-នាំចូលការពង្រីកទីផ្សារជាដើម ។ សមាគម BSEA ត្រូវការជាចាំបាច់នូវការអភិវឌ្ឍន៍ខ្លួន ឲ្យមានស្ថេរភាពហិរញ្ញវត្ថុ ការពង្រីកបណ្តាញទំនងការងារឲ្យកាន់តែទូលំទូលាយ ក្នុងន័យធ្វើយ៉ាងណាឲ្យ BSEA អាចមានសមត្ថភាពពេញ លេញក្នុងការជួយគាំទ្រដល់សមាជិករបស់ខ្លួនឲ្យមានប្រសិទ្ធភាព និងស័ក្ដិសិទ្ធិខ្ពស់ ។ សមាគម បានក្លាយជាសមាជិកពេញសិទ្ធិរបស់សហព័ន្ធនិយោជក និងសមាគមពាណិជ្ជកម្មកម្ពុជា(CAMFEBA) ជាផ្លូវការរួចមកហើយ នឹងកំពុងបំពេញបែបបទសុំចូលជាសមាជិករបស់គម្រោងរោងចក្រកាន់តែប្រសើរនៅកម្ពុជារបស់អង្គការអន្តរជាតិខាងការងារ(ILO-BFC)។ លើសពីនេះទៅទៀត BSEA កំពុងសិក្សាថាតើនៅមានស្ថាប័នពាក់ព័ន្ធណាខ្លះទៀត? ដែលត្រូវធ្វើសុំការគាំទ្រដល់សមាជិករបស់ខ្លួន ក្នុងគោលបំណងរួមចំណែកលើកកម្ពស់លក្ខខណ្ឌការងារឱ្យកាន់តែល្អប្រសើរ និងសុខដុមនីយកម្ម។
មានប្រសាសន៍នាឱកាសនោះឯកឧត្ដមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានសម្តែងការស្វាគមន៍ អបអរសាទរ និងវាយតម្លៃខ្ពស់ចំពោះការបង្កេីតបាននូវសមាគមថ្មីមួយទៀត ដែលមានលក្ខណៈចម្រុះ វិស័យ បន្ថែមលេីសមាគមចំនួនបីដែលបានបង្កេីតរួចហេីយនៅកម្ពុជា រួមមាន៖សមាគមរោងចក្រកាត់ដេរកម្ពុជា (GMAC)-សមាគមរោងចក្រផលិតស្បែកជេីង-និងសមាគមរោងចក្រផលិតផលធ្វេីដំណេីរ កាបូបនិងផលិតផលធ្វេីពីស្បែក ។ ជាមួយគ្នានេះ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ក៏បានសាទរផងដែរដែលសមាគមកំពុងបំពេញបែបបទសុំចូលជាសមាជិករបស់គម្រោងរោងចក្រកាន់តែប្រសើរនៅកម្ពុជា របស់អង្គការអន្តរជាតិខាងការងារ (ILO-BFC) ។ ទាក់ទងចំណុចនេះ ឯកឧត្តមកិត្តិសេដ្ឋាបណ្ឌិត បានធ្វេីការពន្យល់ពីប្រវត្តិនៃការបង្កេីតគម្រោងរោងចក្រកាន់តែប្រសើរនៅកម្ពុជា (BFC)គឺត្រូវលេចចេញជារូបរាង កាលឯកឧត្តមនៅជារដ្ឋមន្ត្រីក្រសួងពាណិជ្ជកម្ម ក្រោមគំនិតដឹកនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដេីម្បីទាក់ទាញការវិនិយោគ ទំនុកចិត្ត និងពង្រីកទីផ្សារនាំចេញកម្ពុជា ។ គួរស្វែងយល់ថា គម្រោងBFC នេះ ជាគំនិតផ្តួចផ្តេីមរបស់ខ្មែរសុទ្ធសាធ ហេីយមានតែនៅកម្ពុជាមួយប៉ុណ្ណោះលេីពិភពលោក ។ ប៉ុន្តែបច្ចុប្បន្នក៏មានប្រទេសមួយចំនួនយកគម្រូតាមដែរ ។ ការដាក់ឲ្យអនុវត្តគម្រោងនេះ គឺគោលបំណងឲ្យម្ចាស់រោងចក្រកាត់ដេរ និងវាយនភ័ណ្ឌទាំងអស់គោរពច្បាប់និងលក្ខខណ្ឌការងារនិង គោរពសិទ្ធិកម្មករ ព្រោះក្រោយកម្ពុជាចរចារបេីកទីផ្សារពាណិជ្ជកម្មក្រៅប្រទេសរួចហេីយ មានរោងចក្រជាច្រេីនរីកដុះដាលដូចផ្សិតនៅកម្ពុជាជាបន្តបន្ទាប់ ហេីយកម្មករភាគច្រេីន ជាស្ត្រីមកពីទីជនបទ និងតំបន់ដាច់ស្រយាល ខ្វះចំណេះដឹង និងបទពិសោធន៍ ។ ដូច្នេះគម្រោងនេះ ដែលមានការត្រួតពិនិត្យនិងដាក់ពិន្ទុពីអង្គការ អន្តរជាតិខាងការងារ (ILO) គឺត្រូវប្រាកដថា រោងចក្រក្នុងគម្រោងBFC ទាំងអស់មិនមានការរំលោភសទ្ធិការងារនិងកម្មករ ឬប្រេីពលកម្មកុមារជាដេីម ។ ការអនុវត្តកាតព្វកិច្ចនេះ ជាជម្រេីសរបស់អ្នកបញ្ជាទិញ ។ ទាក់ទងបញ្ហានេះ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានសង្កត់ធ្ងន់ថា៖បេីសមាគម ឬរោងចក្រណាមួយសម្រេចចិត្តចូលក្នុងគម្រោង BFC កម្ពុជានេះហេីយ ត្រូវខិតខំអនុវត្តតាមលក្ខខណ្ឌការងារនិងច្បាប់ជាធរមាន ដេីម្បីបានការវាយតម្លៃល្អពីអង្គការ ILO ហេីយនឹងមានអ្នកបញ្ជាទិញមានទំនុកចិត្តខ្ពស់ ដោយគេយល់ថាជាផលិតផលគ្មានការរំលោភសិទ្ធិការងារ និងកេងប្រវ័ញ្ចញេីសឈាមកម្មករ កម្មការិនីឡេីយ។
ជាមួយគ្នានេះ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ក៏បានណែនាំឲ្យសមាគមខិតខំគៀងគរសមាជិកឲ្យបានច្រេីន និងជួយទាក់ទាញការវិនិយោគបន្ថែម ហេីយភាគីចិនមានការរីករាយចំពោះការផ្តល់អនុសាសន៍ល្អៗរបស់ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ ហេីយនឹងខិតខំពង្រឹងខ្លួន អនុវត្តច្បាប់ជាធរមាន និងចូលរួមចំណែកក្នុងកំណេីនសេដ្ឋកិច្ច និងទីផ្សារការងារ ជាពិសេសការគៀងគរសាមជិកបន្ថែម គាំទ្រសមាជិក ព្រមទាំងជួយផ្សព្វផ្សាយ ទាក់ទាញវិនិយោគិនឲ្យកាន់តែច្រេីន ។