ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញជាអធិបតីបេីកកិច្ចប្រជុំលេីកទី២ក្រុមប្រឹក្សាជាតិ វិទ្យាសាស្ត្រ បច្ចេកវិទ្យា និងនវានុវត្តន៍
ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ អញ្ជេីញជាអធិបតីបេីកកិច្ចប្រជុំលេីកទី២ក្រុមប្រឹក្សាជាតិ វិទ្យាសាស្ត្រ បច្ចេកវិទ្យា និងនវានុវត្តន៍
ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ព្រឹកថ្ងៃទី ១២ ខែមករាឆ្នាំ២០២២ បានអញ្ជេីញជាអធិបតីបេីកកិច្ចប្រជុំលេីកទី២ក្រុមប្រឹក្សាជាតិវិទ្យាសាស្ត្រ បច្ចេកវិទ្យានិងនវានុវត្តន៍ (ក.ជ.វ.ប.ន)នៅទីស្តីការក្រសួង តាមប្រព័ន្ធអនឡាញ ។
មានប្រសាសន៍បេីកកិច្ចប្រជុំ ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធ បានវាយតម្លៃខ្ពស់និងកោតសរសើរ ចំពោះការចូលរួមនិងសមិទ្ធផលសម្រេចបានរបស់ក្រុមប្រឹក្សា ក.ជ.វ.ប.ន នាពេលកន្លងមក ។
ឯកឧត្តមកិត្តិសេដ្ឋាបណ្ឌិត បានបញ្ជាក់ថា នេះជាលើកទី២ ហើយដែលកិច្ចប្រជុំ ក.ជ.វ.ប.ន. ត្រូវបានរៀបចំឡើង បន្ទាប់ពីកិច្ចប្រជុំលើកទី១ ដែលបានប្រព្រឹត្តិទៅកាលពីថ្ងៃទី៨ ខែកក្កដា ឆ្នាំ២០២១កន្លងទៅ ។
ឯកឧត្តមកិត្តិសេដ្ឋាបណ្ឌិតបានបន្តថា បន្ទាប់ពីរាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិត ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានកិត្តិយសរបស់ ក.ជ.វ.ប.ន. បានចាប់យកវិស័យ វ.ប.ន. ជាមូលដ្ឋានគ្រឹះដ៏សំខាន់សម្រាប់បង្កលក្ខណៈឱ្យប្រទេសកម្ពុជាឈានទៅសម្រេចបាននូវចក្ខុវិស័យប្រកបដោយមហិច្ឆតារបស់ខ្លួនក្នុងការប្រែក្លាយទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលកម្រិតខ្ពស់នៅឆ្នាំ២០៥០ ។ ក្នុងនោះគោលនយោបាយជាតិស្តីពី វិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.)ឆ្នាំ២០២០-២០៣០ត្រូវបានដាក់ឱ្យអនុវត្តនិងផែនទីបង្ហាញផ្លូវ វ.ប.ន. កម្ពុជា ២០៣០ ត្រូវបានសម្រេចអនុម័តដោយ ក.ជ.វ.ប.ន.នៅក្នុងកិច្ចប្រជុំលើកទី១ ។ គួររម្លឹកផងដែរថា ផែនទីបង្ហាញផ្លូវ វ.ប.ន. កម្ពុជា ២០៣០ មានសសរស្តម្ភចំនួន៥ ដែលរួមមាន៖ ១-អភិបាលកិច្ច, ២-ការអបរំ, ៣-ការស្រាវជ្រាវ និងអភិវឌ្ឍន៍, ៤-កិច្ចសហការ, និង ៥-ប្រព័ន្ធអេកូឡូស៊ី។ ផែនទីបង្ហាញផ្លូវនេះ គឺជាត្រីវិស័យដ៏ចាំបាច់សម្រាប់ក្រសួង-ស្ថាប័នពាក់ព័ន្ធក្នុងការអនុវត្តភារកិច្ចរបស់ខ្លួនក្រោមកិច្ចសម្រសម្រួលរបស់ ក.ជ.វ.ប.ន. ដែលផែនការអនុវត្តត្រូវបានដាក់បញ្ចូលក្នុងរបៀបវារៈទី៥ នៃកិច្ចប្រជុំក្នុងថ្ងៃនេះ។
បន្ថែមលើនេះទៅទៀតនោះ សមិទ្ធផលថ្មីៗក្នុងវិស័យ វ.ប.ន. បាននិងកំពុងដើរតួនាទីជាស្នូលដល់វឌ្ឍនភាព វ.ប.ន. កម្ពុជាដែលរួមមាន៖ របៀបវារៈស្រាវជ្រាវជាតិ, កម្មវីធី GO-SPIN (Global Observatory of Science, Technology and Innovation Policy Instruments ), ក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥, ផែនទីបង្ហាញផ្លូវ បច្ចេកវិទ្យាអបរំ និងបច្ចេកវិទ្យាសុខាភិបាល និងបច្ចេកវិទ្យាកសិកម្ម។
បន្ថែមលើកិច្ចការដែលមានក្នុងរបៀបវារៈនៃកិច្ចប្រជុំ, ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តី ចម ប្រសិទ្ធបានទាញចំណាប់អារម្មណ៍មកលើទស្សនៈវិស័យក្នុងការដឹកនាំសម្របសម្រួលក្នុងវិស័យ វ.ប.ន.កម្ពុជាលើកិច្ចការមួយចំនួនផ្សេងទៀតសម្រាប់ជំរុញការអភិវឌ្ឍប្រព័ន្ធអេកូនវានុវត្តជាតិស្របតាគោលនយោបាយ ជាតិស្តីពី វ.ប.ន. ឆ្នាំ២០២០-២០៣០ និងការចង្អុលបង្ហាញរបស់ផែនទីបង្ហាញផ្លូវ វ.ប.ន. កម្ពុជា ២០៣០។ គំនិតផ្តួចផ្តើមទាំងនោះរួមមាន ៖ ការរៀបចំបង្កើតបណ្ឌិត្យសភាវិទ្យាសាស្ត្រ, ការរៀបចំគោលនយោបាយនវានុវត្តន៍ឧស្សាហកម្មកម្ពុជា, ការអង្កេតថ្នាក់ជាតិស្តីពី វ.ប.ន., ការរៀបចំបង្កើតសួន វ.ប.ន. , ការពង្រឹងនិងលើកតម្កើងកម្មវិធី STEM (Science Technology Engineering Mathematics)ក្នុងចំណោមយុវជន, និងការទាក់ទាញបុគ្គលដែលមាន ទេព្យកោសល្យពីបរទេស (Talent Grant In) ជាដើម។
ជាទីបញ្ចប់, ឯកឧត្តមកិត្តិសេដ្ឋាបណ្ឌិត ទេសរដ្ឋមន្រ្តីបានបង្ហាញនូវក្តីសង្ឈឹមដ៏មុតមាំចំពោះការបង្កើនកិច្ចសហការក្នុងវិស័យ វ.ប.ន. និងការពង្រឹងសាម្គីភាពអនុវត្តការងារដើម្បីប្រយោជន៍ជាតិជារួម និងលើកទឹកចិត្តឱ្យមានការចូលរួមផ្តល់ទស្សនទាននានាក្នុងកិច្ចប្រជុំនេះ ដើម្បីជាធាតុចូលសម្រាប់កិច្ចអភិវឌ្ឍន៍វិស័យ វ.ប.ន. កម្ពុជា។