English 
Khmer ពិធីប្រគល់ព្រះរាជក្រឹត្យតែងតាំង និងផ្ដល់ឋានៈដល់ឥស្សរជន និងបញ្ញាវន្ត២៣ រូប
ពិធីប្រគល់ព្រះរាជក្រឹត្យតែងតាំង និងផ្ដល់ឋានៈដល់ឥស្សរជន និងបញ្ញាវន្ត២៣ រូបឲ្យបំពេញមុខងារជាប្រធាន អនុប្រធាន និងសមាជិក នៃគណ:ប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ របស់ក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍
បន្ទាប់ពីក្រសួងឧស្សាហកម្ម បច្ចេកវិទ្យា និងនវានុវត្តន៍ ត្រូវបានបង្កេីតឡេីងតាមព្រះរាជក្រមចុះថ្ងៃទី២៦ ខែមីនា ឆ្នាំ២០២០ រាជរដ្ឋាភិបាលក៏បានសម្រេចឲ្យក្រសួងឧស្សាហកម្ម បច្ចេកវិទ្យា និងនវានុវត្តន៍ រៀបចំក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ ដែលក្រុមប្រឹក្សាជាតិនេះ មានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធានកិត្តិយស និងឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តី រដ្ឋមន្ត្រីក្រសួងឧស្សាហកម្ម បច្ចេកវិទ្យា និងនវានុវត្តន៍ ជាប្រធាន រួមជាមួយអនុប្រធាន និងសមាជិកសរុបទាំងអស់ចំនួន៣៨ រូប ។ ទន្ទឹមនឹងនេះ រាជរដ្ឋាភិបាលក៏បានឲ្យក្រសួងរៀបចំបង្កេីតគណ:ប្រឹក្សាយោបល់វិទ្យាសាស្ត្រ បច្ចេកវិទ្យា និងនវានុវត្តន៍ របស់ក្រុមប្រឹក្សាជាតិ ទ្យាសាស្ត្រ បច្ចេកវិទ្យា និងនវានុវត្តន៍ ហេីយ នៅព្រឹកថ្ងៃទី ២២ ខែធ្នូ ឆ្នាំ២០២០ ត្រូវបានរៀបចំពិធីប្រគល់ព្រះរាជក្រឹត្យជូនប្រធាន អនុប្រធាន និងសមាជិក សរុបចំនួន២៣ រូប ក្រោមអធិបតីភាព ឯកឧត្តមកិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្រ្តីរដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុមប្រឹក្សាជាតិវិទ្យាសាស្ត្រ បច្ចេកវិទ្យា និងនវានុវត្តន៍ នៅទីស្តីការក្រសួង ។
មានប្រសាសន៍នាឱកាសនោះ ក្នុងនាមសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រី នៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាជាតិវិទ្យាសាស្ត្របច្ចេកវិទ្យា និងនវានុវត្តន៍ ឯកឧត្តមកិត្តិសេដ្ឋាបណ្ឌិតទេសរដ្ឋមន្រ្តីចម ប្រសិទ្ធ បានចាត់ទុកឥស្សរជន និងបញ្ញវន្តដែលត្រូវបានតែងតាំងទាំងអស់ គឺជាធនធានខួរក្បាលរបស់ជាតិដ៏សំខាន់ ពីព្រោះអ្នកទាំងអស់គ្នាសុទ្ធតែទទួលបានការទំនុកបម្រុងគាំទ្រពីរាជរដ្ឋាភិបាលដេីម្បីបានទៅបណ្តុះបណ្តាលផ្នែកវិទ្យាសាស្ត្រ និងបច្ចេកវិទ្យា ក្នុងមុខជំនាញផ្សេងៗគ្នា ទាំងក្នុងនិងក្រៅប្រទេស ។ ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី បានសង្កត់ធ្ងន់ថា៖នេះជាឱកាសមាសរបស់របស់ឥស្សរជន និងបញ្ញវន្តទាំងអស់គ្នា ក្នុងការបញ្ចេញចំណេះជំនាញ និងបទពិសោធន៍ដែលខ្លួនបានសិក្សារៀនសូត្រកន្លងមក សម្រាប់ចូលរួមបម្រេីជាតិ មាតុភូមិ និងពលរដ្ឋរបស់យេីង ស្របពេលដែលប្រទេសជាតិ ក៏ដូចជាពិភពលោកកំពុងមានការវិវឌ្ឍន៍ខ្លាំងក្លាផ្នែកវិទ្យាសាស្ត្រ និងបដិវត្តន៍ឧស្សាកម្មជំនាន់៤.០ ។
ឯកឧត្ដមកិត្តិសេដ្ឋាបណ្ឌិតទេសរដ្ឋមន្រ្តី ចម ប្រសិទ្ធ បានរំលឹកផងដែរថា៖កាលពី១០ឆ្នាំមុន នៅឆ្នាំ២០១០ រាជរដ្ឋាភិបាលបានបង្កេីតក្រុមប្រឹក្សាជាតិ វិទ្យាសាស្ត្រ និងបច្ចេកវិទ្យា និងបានបំពេញការងារបានមួយជំហ៊ានហេីយផងដែរ ។ ក៏ប៉ុន្តែយេីងមិនទាន់ប្រមូលផ្តុំបាននូវកំលាំងធនធានរួមរបស់យេីងសម្រាប់ធ្វេីការងារនេះឲ្យចំគោលដៅ និងស្របនិងនិន្នាការវិវឌ្ឍន៍ដ៏ឆាប់រហ័សនាពេលបច្ចុប្បន្ន ។ ដូច្នេះហេីយទេីបនៅចុងឆ្នាំ២០១៩ ប្រមុខរាជរដ្ឋាភិបាល សម្តេចតេជោ នាយករដ្ឋមន្ត្រី ក្រោមចក្ខុវិស័យដ៏មុតស្រួច បានដាក់ចេញនូវគោលនយោបាយមួយទាក់ទងការអភិវឌ្ឍន៍វិស័យវិទ្យាសាស្ត្រ បច្ចេកវិទ្យា និងនវានុវត្តន៍ពីឆ្នាំ២០២០-២០៣០ ហេីយក៏សម្រេចប្តូរឈ្មោះអតីតក្រសួងឧស្សាហកម្មនិងសិប្បកម្ម ទៅជាក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដេីម្បីឲ្យមានក្បាលម៉ាសុីនដឹកនាំច្បាស់លាស់ រួចធ្វេីការប្រមូលផ្តុំអ្នកវិទ្យាសាស្ត្រទាំងអស់ ដែលនៅស្ថាប័នផ្សេងៗគ្នា ចូលក្នុងបញ្ជីសារពេីភ័ណ្ឌមួយសម្រាប់អង្គុយរួមគ្នាធ្វេីការ ដែលឯកឧត្តមកិត្តិសេដ្ឋាបណ្ឌិតទេសរដ្ឋមន្ត្រីសង្ឃឹមថា៖ ឥស្សរជននិងបញ្ញវន្ត ដែលត្រូវតែងតាំងទាំងអស់នឹងសម្រួចចំណេះជំនាញរបស់ខ្លួនដែលបានខិតខំសិក្សារួចហេីយ ទោះកន្លងមក អ្នកខ្លះធ្វេីការខុសមុខជំនាញរៀនសូត្រក៏ដោយ តែពេលនេះជាឱកាសក្នុងការបំពេញការងារជូនជាតិប្រកបដោយមោទនភាព ពីព្រោះរាជរដ្ឋាភិបាល បានលេីកទឹកចិត្តតែងតាំងក្នុងមុខនាទីមួយដ៏ខ្ពង់ខ្ពស់តាមបទពិសោធន៍ចំណេះ ជំនាញ និងសញ្ញបត្រដែលខ្លួនមាន គឺបានតែងតាំងចាប់ពីឋាន:ស្មេីរដ្ឋលេខាធិការ អនុរដ្ឋលេខាធិការ និងអគ្គនាយកឡេីងទៅ ។
