សភាពាណិជ្ជកម្មអឺរ៉ុបនៅកម្ពុជាស្នើឱ្យរដ្ឋាភិបាលសម្រួលបទប្បញ្ញត្តិដើម្បីលើកកម្ពស់បរិយាកាសធុរកិច្ចនៅកម្ពុជា
សភាពាណិជ្ជកម្មអឺរ៉ុបនៅកម្ពុជា (EuroCham) បានស្នើឱ្យរាជរដ្ឋាភិបាលកម្ពុជា សម្រួលវិធានការច្បាប់ ដើម្បីលើកកម្ពស់បរិយាកាសធុរកិច្ច និងទាក់ទាញការវិនិយោគបន្ថែម។
ក្នុងជំនួបសម្តែងការគួរសមជាមួយ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១៦ ខែតុលា ឆ្នាំ២០២៣ លោក Tassilo Brinzer ប្រធានក្រុមប្រឹក្សាភិបាលនៃសភាពាណិជ្ជកម្មអឺរ៉ុបនៅកម្ពុជា បានថ្លែងថា កំណើនសេដ្ឋកិច្ចជាច្រើនទសវត្សរ៍កន្លងមកនេះ និងកំណើនសមត្ថភាពរបស់ក្រសួង-ស្ថាប័នរដ្ឋ ពេលខ្លះ ធ្វើឱ្យមានការបង្កើតច្បាប់ និងបទបញ្ញតិ្តច្រើនពេក។
លោកបានលើកឡើងថា៖ «យើងកំពុងសហការជាមួយសហសេវិកនៅប្រទេសវៀតណាម ថៃ សិង្ហបុរី និងម៉ាឡេស៊ី ដើម្បីទាក់ទាញការវិនិយោគរបស់ក្រុមហ៊ុនអឺរ៉ុប ដែលមានស្រាប់នៅក្នុងតំបន់អាស៊ាន ឱ្យពង្រីកប្រតិបត្តិការរបស់ខ្លួនចូលក្នុងប្រទេសកម្ពុជា។ ការកែសម្រួលបទប្បញ្ញត្តិ និងការកាត់បន្ថយការិយាធិបតេយ្យ ជារួម មានសារៈសំខាន់ណាស់សម្រាប់យើង»។
ឯកឧត្តមរដ្ឋមន្ត្រី បានបញ្ជាក់ពីសារៈសំខាន់នៃការកែសម្រួល និងការធ្វើសុខដុមនីយកម្មបទប្បញ្ញត្តិ និងបានជម្រាបជូនគណៈប្រតិភូសភាពាណិជ្ជកម្មអឺរ៉ុបនៅកម្ពុជាថា រាជរដ្ឋាភិបាលកំពុងធ្វើការវាយតម្លៃផលប៉ះពាល់នៃបទប្បញ្ញត្តិ ដើម្បីដាក់ចេញនូវអន្តរាគមន៍គោលនយោបាយដែលទាក់ទាញការវិនិយោគ និងគាំទ្រដល់កំណើនឧស្សាហកម្ម។
ឯកឧត្តមបានលើកឡើងទៀតថា រាជរដ្ឋាភិបាលយកចិត្តទុកដាក់ចំពោះបញ្ហាប្រឈម និងសំណើរបស់វិស័យឯកជន ហើយនឹងព្យាយាមដោះស្រាយបញ្ហា និងសំណើទាំងនោះ នៅក្នុងវេទិការាជរដ្ឋាភិបាល-វិស័យឯកជន ដែលគ្រោងធ្វើឡើងនៅថ្ងៃទី១៣ ខែវិច្ឆិកាខាងមុខ។
លើសពីនេះ ឯកឧត្តមរដ្ឋមន្ត្រី បានជម្រាបជូនថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ កំពុងអនុវត្តកំណែទម្រង់សេវាសាធារណៈមួយចំនួន ដែលនឹងជួយសម្រួលដល់ការបង្កើតបរិយាកាសធុរកិច្ចអំណោយផល និងព្យាយាមរៀបចំឱ្យមានច្បាប់ បទប្បញ្ញត្តិ និងព័ត៌មានពាក់ព័ន្ធ នានា ជាភាសាអង់គ្លេស និងភាសាខ្មែរសម្រាប់អ្នកវិនិយោគ។
ឯកឧត្តមបានស្នើឱ្យសភាពាណិជ្ជកម្មអឺរ៉ុបសហការដោយផ្តល់នូវទិន្នន័យតម្រូវការធាតុចូល ដូចជាវត្ថុធាតុដើម ដើម្បីរៀបចំបង្កើតការផ្សារភ្ជាប់ទៅខ្សែច្រវាក់ផលិតកម្មនៅក្នុងឧស្សាហកម្ម ដែលគាំទ្រដល់សហគ្រាសធុនតូច និងមធ្យមក្នុងស្រុក។
សភាពាណិជ្ជកម្មអឺរ៉ុប បច្ចុប្បន្ន មានសមាជិកជិត ៤០០ ក្រុមហ៊ុន ហើយថ្មីៗនេះ បានចេញផ្សាយ បច្ចុប្បន្នភាព សៀវភៅស និង Advocacy Compass របស់ខ្លួន ដែលផ្តល់អនុសាសន៍គោលនយោបាយពាណិជ្ជកម្ម និងវិនិយោគស្តីពីកម្ពុជា។